AI Cinema: సినిమా సూపిత్త మావా
ABN , Publish Date - May 26 , 2025 | 03:34 AM
.png)
ఏఐ సాయంతో రెండు వ్యక్తులు కలసి నిర్మించిన తొలి కన్నడ సినిమా ‘లవ్‌ యూ’ విడుదలైంది. కథ, నటీనటులు, పాటలు, గ్రాఫిక్స్‌ అంతా కృత్రిమ మేధతో రూపొందించడమే విశేషం.
AI Cinema: సినిమా సూపిత్త మావా
నటులు, బ్యాక్‌గ్రౌండ్‌, మ్యూజిక్‌ అంతా ఏఐతోనే!
కథ, స్ర్కీన్‌ప్లే, పాటలు, మాటలూ దానితోనే..
అద్భుతమైన, అందమైన ఏఐ క్యారెక్టర్లు
నచ్చిన గొంతు.. కావాల్సినట్టుగా సంగీతం
ఖర్చు లేకుండానే అందమైన లొకేషన్లు మొత్తంగా ఏఐతోనే రూపొందిన కన్నడ సినిమా ‘లవ్‌ యూ’
కేవలం ఇద్దరు కూర్చుని రూ.10 లక్షలతో పూర్తి
ఏఐతో చైనా సినిమా.. ‘పైరేట్‌ క్వీన్‌’
సినిమా ఇండస్ట్రీకి ఇది వరమా?.. శాపమా?
సినిమా అంటే 24 కళల సమాహారం. దర్శకుడు, నటీనటుల నుంచి లైట్‌ బాయ్‌ వరకు.. ఎడిటింగ్‌ నుంచి వీఎ్‌ఫఎక్స్‌ వరకు వందలు, వేల మంది కలిసి పనిచేస్తే.. కొన్ని నెలల పాటు కష్టపడితేనేగానీ ఒక సినిమా పూర్తికాదు. కానీ ఇద్దరు వ్యక్తులు ఓ గదిలో కూర్చుని.. రెండు, మూడు కంప్యూటర్లు పెట్టుకుని.. పూర్తిస్థాయి సినిమాను సిద్ధం చేసేస్తే!! కథ, స్ర్కిప్టు దగ్గరి నుంచి నటీనటులు, సంగీతం, పాటలు, గ్రాఫిక్స్‌ ఇలా మొత్తం ‘24 క్రాఫ్ట్స్‌’ పని.. ఒక్కరే చేసేస్తే!! చేసేస్తే కాదు... ‘కృత్రిమ మేధ (ఏఐ)’ చేసి చూపిస్తోంది.. ‘సినిమా’ చూపిస్తోంది. కంప్యూటర్‌ ముందు కూర్చుని తగిన సూచనలు ఇస్తే చాలు.. మనకు కావాల్సినట్టుగా దృశ్యాలను రూపొందిస్తోంది.
స్ర్కిప్టు ప్రకారం.. సీన్లను, వాటికి తగినట్టుగా ఆడియోలను రూపొందించడం.. కలిపి.. ఎడిట్‌ చేసి.. సినిమాను సిద్ధం చేసేయడమే! ఇలా పూర్తిగా ఏఐతోనే తీసిన కన్నడ సినిమా ‘లవ్‌ యూ’ ఇటీవలే విడుదలైంది. అటు చైనాకు చెందిన ‘పైరేట్‌ క్వీన్‌ - ఝెంగ్‌ యి సావో’ కూడా తెరపైకి వచ్చింది. ఈ రెండు చిత్రాలు ‘సినిమా’ భవిష్యత్తును వెండితెరపై కళ్లకు కడుతున్నాయి.
ఇద్దరు కూర్చుని తీసిన సినిమా ‘లవ్‌ యూ’
కర్ణాటకలో ఇటీవలే విడుదలైన రొమాంటిక్‌, లవ్‌ సినిమా ‘లవ్‌ యూ’.. బెంగళూరు శివార్లలోని సిద్దెహళ్లికి చెందిన పూజారి, రచయిత నరసింహమూర్తి, ఏఐ టెక్నీషియన్‌, గ్రాఫిక్‌ డిజైనర్‌ నూతన్‌.. కలసి ఆరు నెలల్లో కృత్రిమ మేధ (ఏఐ) టూల్స్‌ సాయంతో ఈ సినిమా తీశారు. 15 మంది పాత్రధారుల (క్యారెక్టర్ల)తో 95 నిమిషాలు నిడివి ఉన్న ఈ సినిమాలో 12 పాటలు కూడా ఉన్నాయి. ఇందులోని పాత్రధారులు, వారి నటన, దృశ్యాలు, సంగీతం, పాటలు, మాటలు మొత్తం అంతా కృత్రిమ మేధతో సృష్టించినవే. ఈ సినిమా నిర్మాణం కోసం అయిన ఖర్చు కేవలం రూ.10 లక్షలేనని, అది కూడా కంప్యూటర్లు, సాఫ్ట్‌వేర్లు, ఏఐ సేవల సబ్‌స్ర్కిప్షన్ల కోసం అయిన ఖర్చేనని సినిమా మేకర్లు చెప్పారు.. 30 రకాల ఏఐ టూల్స్‌ వినియోగించామని తెలిపారు. సెన్సార్‌ బోర్డు ఈ సినిమాకు యూ/ఏ సర్టిఫికెట్‌ కూడా ఇచ్చింది. అయితే దీనికి తొలి ఏఐ సినిమాగా గుర్తింపు కోసం.. కేవలం ఒక థియేటర్‌లో విడుదల చేశారు.
సినిమాల్లో ఏఐ.. సిత్రాలెన్నో..
చైనాకు చెందిన ‘పైరేట్‌ క్వీన్‌ - ఝెంగ్‌ యి సావో’ కూడా మొత్తంగా ఏఐతో నిర్మించిన చిత్రం. ఓ మహిళా సముద్రపు దొంగ (పైరేట్‌) నిజజీవిత కథతో.. మలేషియాకు చెందిన ఫ్యూచర్‌ స్టూడియోస్‌, సింగపూర్‌కు చెందిన ఫిజ్‌ డ్రాగన్‌ సంస్థలు సంయుక్తంగా ఈ సినిమాను సిద్ధం చేశాయి. స్ర్కిప్టు రూపకల్పన నుంచి నటీనటులు, వారి గొంతు, సంగీతం అంతా ఏఐతోనే సృష్టించామని మేకర్లు గతంలోనే ప్రకటించారు. ఈ ఏడాది ఏప్రిల్‌ 24నే ఈ సినిమా ప్రీమియర్‌ షోను ప్రదర్శించారు. మాండరిన్‌ (చైనా), ఇంగ్లిష్‌ భాషల్లో ఈ ఏడాది జూన్‌ లేదా జూలైలో థియేటర్లలో విడుదల చేయనున్నట్టు ప్రకటించారు.
ఇటలీకి చెందిన ‘ది డైరీ ఆఫ్‌ సిసిఫస్‌ (2023)’, స్విట్జర్లాండ్‌కు చెందిన ‘ది లాస్ట్‌ స్ర్కీన్‌ రైటర్‌ (2024)’ సినిమాలకు కథ, స్ర్కీన్‌ ప్లే మొత్తాన్ని ఏఐతోనే సిద్ధం చేశారు.
అమెరికాలో ‘డ్రెడ్‌క్లబ్‌-వాంపైర్స్‌ వెర్డిక్ట్‌ (2024)’ యానిమేటెడ్‌ సినిమాను చాలా వరకు ఏఐతోనే రూపొందించారు. దీనికి కేవలం రూ.40 వేలు మాత్రమే ఖర్చయినట్టు మేకర్లు ప్రకటించారు.
తమిళ సినిమా ‘కంగువ’ను ఎనిమిది భాషల్లో విడుదల చేసేందుకు.. ఏఐ సాయంతో ఆయా భాషల్లో సూర్య గొంతుతోనే డబ్బింగ్‌ను సృష్టించారు.
భవిష్యత్తులో మరింత మెరుగ్గా...
ఏఐతో సినిమా అచ్చంగా మామూలు సినిమాల్లా ఉండటం ప్రస్తుతానికి కష్టమే. ఏఐతో తీసిన ‘లవ్‌ యూ’ సినిమాగానీ, షార్ట్‌ వీడియోలుగానీ ఏవైనా పాత్రల ముఖకవళికలు, గొంతుకు తగినట్టుగా పెదాల కదలిక ఇంకా పూర్తిస్థాయిలో అభివృద్ధి చెందలేదు. దీనితో చాలా వరకు లాంగ్‌ షాట్‌ సీన్లు సృష్టించాల్సి ఉంటుంది. ఇక పాత్రల శారీరక కదలికలు, హావభావాలు, చుట్టూ ఉన్న పరిసరాలు... ఒకే సీన్‌లోనూ, వేర్వేరు సీన్లలో కూడా అసాధారణంగా కనిపిస్తుంటాయి. మారిపోతూ ఉంటాయు. లవ్‌ యూ, పైరేట్‌ క్వీన్‌-ఝెంగ్‌ యి సావో సినిమాల్లోనూ ఇదే కనిపించింది. కానీ సినిమాల చరిత్రలో ఇదో కొత్త అధ్యాయాన్ని ప్రారంభించిందని నిపుణులు చెబుతున్నారు. ఈ సినిమాల కోసం వాడిన ఏఐల కంటే మెరుగైనవి ఈ కొన్ని నెలల్లో అందుబాటులోకి వచ్చాయని.. మరింత స్పష్టమైన, మెరుగైన సినిమాలు తీయవచ్చని స్పష్టం చేస్తున్నారు.
మరో 15 ఏళ్లే సమయం
సోషల్‌ మీడియా ఏఐ ‘గ్రోక్‌’ అంచనా వేసిన మేరకు మరో మూడేళ్లలో ఇరవై నిమిషాల్లోపు షార్ట్‌ ఫిల్మ్స్‌లు ఏఐతో అద్భుతంగా రూపొందుతాయి. మరో ఏడేళ్లలో సాధారణ స్థాయి సినిమాల రూపకల్పన కూడా వీలవుతుంది. అదే మరో 15 ఏళ్లలో హాలీవుడ్‌ స్థాయిలో అద్భుతమైన సినిమాలను ఏఐతోనే తెరకు ఎక్కించవచ్చు. అప్పటికల్లా హీరోలు, హీరోయిన్లు సహా చాలా మంది నటీనటులు, ఇతర సినీ విభాగాల వారిపై ఏఐ ప్రభావం గట్టిగానే పడవచ్చని పేర్కొంది.
ఏఐ ‘సినిమా’కు ఏం కావాలి?
జస్ట్‌ ఒకట్రెండు ఆధునిక కంప్యూటర్లు..
వీడియో, ఆడియో ఎడిటింగ్‌ సాఫ్ట్‌వేర్లు..
ఇచ్చిన సూచనలకు అనుగుణంగా దృశ్యాలను సిద్ధం చేసి ఇచ్చే ‘జనరేటివ్‌ ఏఐ టూల్స్‌’ను సబ్‌స్ర్కైబ్‌ చేసుకోవడానికి అవసరమైన సొమ్ము
గూగుల్‌ జనరేటివ్‌ ఏఐ టూల్‌ ‘వియో 3’ ఆధారిత ‘ఫ్లో’ టూల్‌, డైరెక్టర్‌ ఏఐ, సినిమాటోగ్రాఫర్‌ ఏఐ, స్టంట్స్‌ ఏఐ, రన్‌వే ఎమ్‌ఎల్‌, క్లింగ్‌ ఏఐ, మినిమాక్స్‌... ఇలా పదులకొద్దీ ఏఐ సినిమా టూల్స్‌ అందుబాటులో ఉన్నాయి.
ఇండస్ట్రీకి నష్టమే?
ఏఐని వినియోగించడం ద్వారా సినిమాల్లో దృశ్యాలను మనోహరంగా తీర్చిదిద్దవచ్చు. నటీనటుల్లోని లోపాలను సవరించడంతోపాటు అద్భుతమైన గ్రాఫిక్స్‌ను సృష్టించవచ్చు. అవతార్‌ వంటి సినిమాలు అలా రూపొందించినవే. అయితే అందులోని పాత్రలను ‘మోషన్‌ క్యాప్చర్‌, సీజీఐ’ వంటి సాంకేతికతలతో రూపొందించారు. మనుషులకే సెన్సర్లు, పరికరాలు అమర్చి.. హావాభావాలు, కదలికలను వారితో పలికించి.. ఆయా క్యారెక్టర్లకు అనుసంధానిస్తారు. కానీ పూర్తిగా ఏఐతో రూపొందించడం వేరు. నటీనటులు, మ్యూజిక్‌ డైరెక్టర్లు, రచయితలు, సింగర్లు, డబ్బింగ్‌ ఆర్టిస్టులు, ఆర్ట్‌ డైరెక్టర్లు, లైటింగ్‌ విభాగం, సినీ సర్వీసులు.. ఇలా ఎవరూ ఉండరు. కేవలం కంప్యూటర్లపైనే అంతా. అయితే ముఖ కవళికలు సరిగా లేని, హావాభావాలూ పలకని నటీనటులను ఎంతో కాలంగా భరిస్తున్నామని... ఏఐ యుగంలో అలాంటి వారి అవసరం లేకుండా అద్భుతమైన, అందమైన పాత్రలతో సినిమాలు తీయవచ్చని టెక్‌ నిపుణులు వ్యాఖ్యానిస్తున్నారు.
pirate queen zheng yi sao
https://www.youtube.com/watch?v=l3f4EbyzsDA
Love You (Kannada) - Official Trailer | Worlds First Ai Kannada Movie | S.Narasimhamurthy | Nutan
https://www.youtube.com/watch?v=q7cb9oLs1hU
https://www.youtube.com/watch?v=IX4bAAlYYWs
